شي جينپيڭ بىلاي دەپ اتاپ كورسەتتى: جۇڭگو مەن برۋنەي تەڭىز ارقىلى تۇتاسقان دوس كورشى ەلدەر ءارى ءبىر-بىرىنە سەنەتىن، ءبىرىن-ءبىرى قولدايتىن جاقسى سەرىكتەر. ديپلوماتيالىق قاتىناس ورناتقان 30 نەشە جىلدان بەرى، ەكى ەل ساياسي سەنىمدىلىكتى ۇزدىكسىز تەرەڭدەتىپ، دامۋ ستراتەگياسىن بەلسەنە ۇشتاستىرىپ، ءار سالاداعى ناقتى سەلبەستىكتە سۇبەلى تابىستارعا قول جەتكىزىپ، حالىقارالىق جانە وڭىرلىك ىستەردە تاماشا سايكەسۋدى ساقتاپ، ۇلكەندى-كىشىلى ەلدەردىڭ تەڭ تۇرعىدا مامىلە جاساۋىنىڭ، ءوزارا پايدا جەتكىزىپ، تەڭ يگىلىككە كەنەلۋىنىڭ ۇلگىسىن ورناتىپ، ءوڭىردىڭ بەيبىتشىلىگىنە، ورنىقتىلىعىنا جانە دامۋىنا، گۇلدەنۋىنە بەلسەندى ۇلەس قوستى. بيىل جۇڭگو مەن برۋنەيدىڭ ستراتەگيالىق سەلبەستىك سەرىكتەستىك قاتىناس ورناتقاندىعىنىڭ 5 جىلدىعى. جۇڭگو برۋنەيمەن بىرگە «ءبىر بەلدەۋ، ءبىر جولدى» جوعارى ساپامەن بىرگە قۇرىپ، ەكى جاقتى قاتىناستىڭ ۇزدىكسىز تىڭ دامۋعا قول جەتكىزۋىن ىلگەرىلەتىپ، ەكى ەل حالقىنا ءتىپتى دە كوپ باقىت جاراتۋدى قالايدى.

    شي جينپيڭ مىنالاردى باسا دارىپتەدى: جۇڭگو برۋنەيدىڭ ءوز مەملەكەت جاعدايىنا ۇيلەسەتىن دامۋ جولىمەن ءجۇرۋىن قولدايدى، برۋنەيدىڭ ساپالى ونىمدەرىنىڭ جۇڭگوعا ەكسپورتىن كەڭەيتۋىن قارسى الادى، ءتىپتى دە كوپ جۇڭگو كاسىپورىندارىن برۋنەيگە بارىپ قارجى قوسىپ، شارۋاشىلىقتى گۇلدەندىرۋگە، استىق حاۋىپسىزدىگى، سيفرلى ەكونوميكا، جاسىل دامۋ سياقتى سالالارداعى ناقتى سەلبەستىكتى كەڭەيتۋگە، وقۋ-اعارتۋ، مادەنيەت، ساياحات، دەنساۋلىق ساقتاۋ، جەرگىلىكتى ورىندار سياقتى گۋمانيتارلىق اۋىس-كۇيىستى ورىستەتۋگە شابىتتاندىرادى. ەكى جاق بىرگە قۇلشىنىپ، تەڭىزدى بىرگە اشۋدا بەلسەندى ىلگەرىلەۋشىلىككە قول جەتكىزىپ، نانحاي تەڭىزىنىڭ بەيبىتشىلىگى مەن ورنىقتىلىعىن بىرگە قورعاۋى كەرەك. جۇڭگو شىعىس ازيا سەلبەستىگىنە ايرىقشا ءمان بەرەدى، برۋنەي سياقتى شىعىس وڭتۇستىك ازيا وداعىنداعى ەلدەرمەن بىرگە وڭىرلىك ەكونوميكانىڭ ءبىر تۇلعالانۋىن ىلگەرىلەتىپ، شىعىس ازيا سەلبەستىگىنىڭ دۇرىس بەتالىسىن قورعاۋدى قالايدى.

    حاساننال جۇڭگونىڭ تاياۋدا حاڭجوۋ ازيا سپورت جارىسىن ءساتتى وتكىزگەندىگىن قۇتتىقتاپ، بىلاي دەدى: برۋنەيدىڭ جۇڭگومەن دوستىق بارىس-كەلىسىنىڭ تاريحى ۇزاق، ەكى ەل قاتىناسى باستان-اياق تاماشا دامۋدى ساقتاپ، ءار سالاداعى اۋىس-كۇيىس، سەلبەستىك اياق الىسى ءساتتى بولدى. برۋنەي باستان-اياق ءبىر جۇڭگو ساياساتىن باتىل اتقارادى. برۋنەي جۇڭگومەن قاتىناستى دامىتۋعا ايرىقشا ءمان بەرەدى، ەكونوميكا-ساۋدا، اۋىل شارۋاشىلىعى، بالىق شارۋاشىلىعى، جاسىل ەنەرگيا سياقتى سالالارداعى سەلبەستىكتى كۇشەيتۋگە ۇزدىكسىز كۇش سالىپ، گۋمانيتارلىق اۋىس-كۇيىستى تەرەڭدەتىپ، "ءبىر بەلدەۋ، ءبىر جولدى" جوعارى ساپامەن بىرگە قۇرۋدى بەلسەنە ىلگەرىلەتۋدى قالايدى. برۋنەي جۇڭگومەن شىعىس وڭتۇستىك ازيا ەلدەرى وداعى جۇلگەسىندەگى سەلبەستىكتى ۇزدىكسىز كۇشەيتۋدى قالايدى، نانحاي تەڭىزى وڭىرىندەگى ەلدەردىڭ ارەكەت ولشەمىن ەرتەرەك جاساپ، نانحاي تەڭىزىن بەيبىتشىلىك، دوستىق تەڭىزىنە اينالدىرۋعا بىرگە قۇلشىنىپ، ءوڭىردىڭ بەيبىتشىلىگى مەن حاۋىپسىزدىگىن جەبەۋدى ءۇمىت ەتەدى. برۋنەي جۇڭگومەن پالەستين-يزرايل قاقتىعىسى سياقتى وڭىرلىك ماسەلەلەر جونىندە ءجيى پىكىرلەسۋدى قالايدى. ساي چي، ۋاڭ ي قاتارلىلار كەزدەسۋگە قاتىناستى.

اۋدارعان: گۇلنۇر قابىلقاق قىزى