لي جانشۋ ۋگاندانىڭ پارلامەنت باستىعىمەن كەڭەستى
ٴوز حابارىمىز. مەملەكەتتىك حالىق قۇرىلتايى تۇراقتى كوميتەتىنىڭ باستىعى لي جانشۋ 10-ايدىڭ 21-كۇنى بەيجيڭدەگى حالىق سارايىندا ۋگاندانىڭ پارلامەنت باستىعى ورانيامەن بەينە ەكران فورماسىندا كەڭەستى.
لي جانشۋ بىلاي دەدى: جۇڭگو مەن ۋگاندا جاقسى باۋىرلاس ، تاتۋ دوس، تاماشا سەرىك. ٴتوراعا شي جينپيڭ مەن پرەزيدەنت مۋسەۆەنيدىڭ ستراتەگيالىق جەتەكشىلىگى مەن جەبەۋىندە، ەكى ەلدىڭ ساياسي سەنىمدىلىگى ۇزدىكسىز بەكەمدەلىپ، ناقتى سەلبەستىگى تەبىندەپ، ەكى ەل حالقى جاپپاي يگىلىككە كەنەلدى. جۇڭگو ۋگاندامەن بىرلىكتە ەكى ەل باسشىلارى كەلىسكەن ماڭىزدى ورتاق تانىمدى ويداعىداي تياناقتاندىرىپ، الدا اشىلاتىن جۇڭگو ـ افريكا سەلبەستىك تالقىسىنىڭ جاڭا كەزەكتى ٴماجىلىسىن وراي ەتە وتىرىپ، ىنتىماقتى-سەلبەستىكتى كۇشەيتىپ، ەكى ەلدىڭ دامۋى مەن حالىقتىڭ باقىتتى تۇرمىسىن اناعۇرلىم جەبەۋدى قالايدى.
لي جانشۋ جۇڭگو مەن ۋگاندانىڭ جالپى بەتتىك سەلبەستىك سەرىكتەستىك قاتىناسىن دامىتۋ جونىندە مىناداي 3 ٴتۇرلى ۇسىنىس قويدى: بىرىنشىدەن، ساياسي جاقتاعى ٴوزارا قولداۋدى ۇزدىكسىز كۇشەيتۋ. ۋگاندانىڭ ۇزاق ۋاقىتتان بەرى جۇڭگونىڭ وزەكتى مۇددەسىنە جانە ٴجىتى قاداعالاپ وتىرعان كەلەلى ىستەرىنە ساياتىن ماسەلەلەردە جۇڭگونى باتىل قولداعاندىعىن القايمىز. ەكىنشىدەن، ناقتى سەلبەستىكتى تەرەڭدەتىپ، ورتاق دامۋدى جەبەۋ. ۋگاندانىڭ «جەرشارىندىق دامۋ دارىپتەمەسىن» تياناقتاندىرۋعا بەلسەنە ات سالىسىپ، جەرشارىندىق دامۋدىڭ تاعدىرلاس ورتاق تۇلعاسىن قۇرۋدى ىلگەرىلەتۋىن قارسى الامىز. ۇشىنشىدەن، ىندەتكە توتەپ بەرۋ سەلبەستىگىن كۇشەيتۋ. جۇڭگو ۆاكسينانى دۇنيە جۇزىلىك الەۋمەتتىك ٴونىم ەتۋ ۋادەسىن قۇلشىنا ٴامالياتتا ايگىلەپ، ۆاكسينانى دۇنيە ٴجۇزى كولەمىندە ٴادىل، ۇيلەسىمدى بولىسكە سالۋدى جەبەيدى. ۆيرۋس قاينارىن عىلمي تەكتەۋدى باتىل قولداپ، دۇنيە ٴجۇزىنىڭ ىندەتكە توتەپ بەرۋ جالپى جاعدايىن قورعاۋدى ٴۇمىت ەتەمىز.
لي جانشۋ مىنالاردى اتاپ كورسەتتى: جۇڭگو مەملەكەتتىك حالىق قۇرىلتايى ۋگاندا پارلامەنتىمەن بىرگە قۇلشىنىپ، ەكى ەل قاتىناسىنىڭ اناعۇرلىم زور دامۋىن جەبەۋدى قالايدى. ەكى ەلدىڭ جوعارى جىكتەگىلەر بارىس ـ كەلىسىن ساقتاپ، قارجى قوسۋ، ونەركاسىپ باقشا رايونى سياقتى سالالارداعى زاڭ شىعارۋ اۋىس ـ كۇيىسىن كۇشەيتىپ، قاتىستى زاڭ ـ تۇزىمدەردى جەدەل كەمەلدەندىرىپ، كەدەيلىكتەن قۇتىلدىرۋ، اۋىل ـ قىستاقتى گۇلدەندىرۋ سياقتى جاقتارداعى ۇتىمدى ادىستەردەن ورتاق يگىلىكتەنىپ ، ٴار ەل پارلامەنتتەر وداعى سياقتى كوپ جاقتى ورىنداردا سايكەسۋدى كۇشەيتۋىن ٴۇمىت ەتەمىن.
ورانيا بىلاي دەدى : ۋگاندا حالقى جۇڭگو حالقىنىڭ كومەگى مەن قولداۋىنا العىس ايتادى. ەكى ەل ساۋدا ، نەگىزدىك قۇرىلعى سياقتى سالالاردا تاماشا سەلبەستىك ورىستەتتى. ۋگاندا ٴبىر جۇڭگو ساياساتىن باتىل اتقارادى. افريكا مەن كوپتەگەن حالىقارالىق ماسەلەلەردە ەكى ەل ۇقساس مايدان جانە قۋاتتاما ۇستانىپ كەلدى. ۋگاندا پارلامەنتى جۇڭگونىڭ مەملەكەتتىك حالىق قۇرىلتايىمەن اۋىس ـ كۇيىستى، ٴوزارا ۇلگى الۋدى كۇشەيتىپ، ەكى ەل قاتىناسىنىڭ دامۋىن جەبەۋدى قالايدى.
اۋدارعان: امانتاي مۇسايىپ ۇلى
