داڭىقتى جۇڭگو كوممۋنيستىك پارتيامىز قۇرىلعانىنا تۇپ-تۋرا ءبىر عاسىر، بۇرقاسىندى داۋىلداردان، نوسەرلەگەن جاۋىنداردان، تار جول، تايعاق كەشۋلەردەن وتكەن ــ سۇراپىل ءبىر عاسىر.

ادامزات تاريحىنا التىن ارىپپەن جازىلعان بۇل كۇن ــ ءبىر عاسىردىڭ الدىندا كەلەلى شەشىم، ماڭىزدى بەكىم جاساپ، ۇلى توڭكەرىسكە جويقىن باستاما سالعان ەدى.

الىپ جۇڭحۋا توپىراعىنداعى 56 ۇلتتىڭ كەلەشەگى مەن باقىتى ءۇشىن مۇعجيزا جاراتقان پارتيامىزدىڭ عاسىرلىق تويىن مەرەيلى تۇردە قارسى الۋ ـــ ەلىمىزدەگى ءبىر ميلليارد ءتورت ءجۇز ميلليون حالىقتىڭ ابىرويلى ءىسى بولماق.

مىنە وسىنداي دابىرالى ساتتە، جۇڭگوداعى ءۇش قازاق اۆتونوميالى اۋداننىڭ ءبىرى ــ موري قازاق اۆتونوميالى اۋدانى مەرەيلى تويعا اق شاشۋ رەتىندە، اۆتونوميالى رايوندىق ادەبيەت-كوركەمونەرشىلەر بىرلەستىگى جاعىنان شىعاتىن، پارتيا-ۇكىمەتىمىزدىڭ ارقاسىندا حالقىمىزدىڭ مۇراعاتى مەن ۇلاعاتىن ۇگىتتەيتىن «مۇرا» جۋرنالى رەداكسيا ۇجىمىمەن سايكەسىپ، ارناۋلى سان شىعارىپ، موري قازاق اۆتونوميالى اۋدانىنداعى 80 مىڭنان استام حالىق بۇقاراسىنىڭ، پارتيامىز بەن ۇكىمەتىمىزگە دەگەن تەبىرەنىسكە تولى ۇندەرىن جۋرنال بەتىندە ۇگىتتەدى.

مۇندا ايتا كەتەرلىگى، ەلىمىزدەگى قازاق ۇلتىنىڭ ۋاكىلدىك مادەنيەتى مەن حالىقتىق داستۇرىنە ىجداعاتتى ءارى ەڭبەكشىل موري حالقى، پارتيامىزدىڭ شۇعىلالى ساياساتىنىڭ ساياسىندا وزەكتى ونەرىن شالقىتىپ، اينالا جۇرتتى تاڭداي قاقتىرىپ كەلە جاتقانى كوپتەن ايگى.

مىنە وسىنداي وزىندە بار وزگەشە ونەرىن، ەڭبەكشىل قاجىرلى رۋحىن تاعى ءبىر رەت، بۇكىل الەم كوز تىككەن جۇڭگو كوممۋنيستىك پارتيامىز قۇرىلعاندىعىنىڭ 100 جىل تولۋىنا وراي اتاۋلى تويىندا تاعى ءبىر قىرىنان دالەلدەدى.

2021-جىلى 4-ايدىڭ 16-كۇنى ش ۇ ا ر ادەبيەت كوركەمونەرشىلەر بىرلەستىگى «مۇرا» جۋرنالى رەداكسياسىنىڭ ورىنباسار باس رەداكتورى جانار نۇرسول قىزىنىڭ بەلسەندى سايكەسۋىندە، موري قازاق اۆتونوميالى اۋدانى پارتكوم ۇگىت ءبولىمىنىڭ تىعىز ورنالاستىرۋىندا، اۋدان كولەمىندەگى ەلۋگە تارتا قالامگەرلەرمەن ارناۋلى سانعا شىعارما قابىلداۋ اڭگىمە تالقى جيىنىن وزدىرعان بولاتىن.

مىنە سودان، ارى-بەرىسى ەكى-اق ايدىڭ مەزىرەتىندە، جۋرنال رەداكسياسى موري اۋدانى كولەمىندەگى قالامگەرلەردەن جۇزدەن استام شىعارما قابىلداپ، تاڭداپ، سۇرىپتاپ، جۋرنال ۇجىمىنداعى قىزمەتكەرلەردىڭ قىزۋ ىسكە كىرىسۋىندە، تاريحقا التىن ارىپپەن جازىلاتىن «جۇڭگو كوممۋنيستىك پارتياسى قۇرىلعانىنا 100 جىل» اتتى داڭسالى تويعا ۇلگىرتىپ، «مۇرا» جۋرنالىنىڭ موري اۋدانىنا ارنالعان ياعني كەزەكتى 4-سانىن قالىڭ وقىرمان قاۋىممەن جۇزدەستىرىپ ۇلگىردى.

بۇل رەتكى قىرپۋلى قيمىلعا باستان-اياق اۋداندىق ۇگىت ءبولىمىنىڭ ورىنباسار باستىعى جانات اسان ۇلى تىكە جاۋاپتى بولىپ، جوعارى - تومەنگە شاپقىلاپ، اۆتورلاردان شىعارما قابىلداۋ، ونى سارالاپ رەداكسياعا جىبەرۋ جانە باسقادا قيمىلعا قاتىستى اكىمشىلىكتەگى قىرۋار شارۋالاردىڭ شالعايىن قايىرىپ، كەلەلى ءىستىڭ بۇيداسىن ۇستاپ، ءوز مارەسىنە جەتكىزدى.

كۇنى كەشە عانا ياعني 6-ايدىڭ 27-كۇنى مۇرا جۋرنالىنىڭ «جۇڭگو كوممۋنيستىك پارتياسى قۇرىلعاندىعىنىڭ 100 جىلدىعىن قۇتتىقتاۋ بايلانىسىمەن موري قازاق اۆتونوميالى اۋدانىنا ارنالعان سانىن» اۋدانداعى بارشا وقىرمان جۇرتتىڭ قولىنا تابىستاپ، قالىڭ بۇقارانىڭ پارتياعا دەگەن العىستى كوڭىلىن تەڭىزدەي تولقىتتى.

حاباردى جازعان: حاميت زامەرحان ۇلى

سۋرەتپەن قامداعان: الدار كوكسەگەن ۇلى