ينفورماتسيا اشكەرەلەۋ: mzjubao@cnr.cn

وزەكتى ماقالالار

قوي ءسۇتىنىڭ باعاسى %50 قىمباتتادى

来源:央广网     |责编:古丽美热·霍孜汗|     发布日期: 2021-10-24 14:34

قوي ءسۇتىنىڭ باعاسى %50 قىمباتتادى

 

 

قوي ءسۇتىنىڭ باعاسى %50 قىمباتتاپ، 10 ميلليارد يۋاندىق بازار قالىپتاستى، مۇنداعى سەبەپ نەدە 

قوي ءسۇتى بازارىنىڭ ساتىلۋ كولەمى 10 ميلليارد يۋاننان اسىپ، كاسىپ سالاسىنىڭ جىلدىق ورتاشا كۇردەلى ارتۋ قارقىنى %25 تەن جوعارى بولدى، تۇتىنۋشىلاردىڭ قوي ءسۇتىن قابىلداۋ دارەجەسى ورنىقتى تۇردە جوعارىلاپ بارادى.

 

قوي ءسۇتى بازارىنىڭ كولەمى 10 ميلليارد يۋاننان اسىپ، تۇتىنۋشىلاردىڭ قوي ءسۇتىن قابىلداۋ دارەجەسى ورنىقتى تۇردە جوعارىلاپ بارادى

 

شانشي ولكەسى شي-ان قالاسىنداعى ءبىر ءسۇت ونىمدەرىن ساتاتىن دۇكەندەگى سورەدە قوي سۇتىنەن جاسالعان الۋان ءتۇرلى ونىمدەر كورسەتىلىپتى، مۇندا قوي ءسۇتى پاراشوگى (نايفىن)، قوي ءسۇتى تۇيمەشەسى (نايپيان) قاتارلىلاردىڭ بارلىعى تابىلادى. 

 

شانشي ولكەسى شي-ان قالاسىنداعى ءبىر تۇتىنۋشى بىلاي دەدى: قوي ءسۇتى پاراشوگىنىڭ ءبىر قورابى 200 يۋان اينالاسىندا تۇرادى، ادەتتە جارتى ايدان 1 ايعا دەيىن تۇتىنۋعا جەتەدى. 

ءمالىم ءبىر ءسۇت پاراشوگى ماركاسىنىڭ مەملەكەتتىك تيجارات باس باقىلاۋشىسى باي يان: بىلتىر 1-ايدان 9-ايعا دەيىن مەملەكەت كولەمىندە 30 مىڭ جاشىك مولشەرىندە ءسۇت پاراشوگىن ساتقامىز، ال بيىل 1-ايدان 9-ايعا دەيىنگى ساتىلۋ مولشەرى 35 مىڭ جاشىكتەن اسىپ كەتتى، ۇقساس مەزگىلدەگىمەن سالىستىرعاندا بىلتىرعىدان ارتۋ مولشەرى %30 اينالاسىندا بولدى، ـ دەدى.

 

قازىر قوي ءسۇتىن تۇتىناتىندار نەگىزىنەن نارەستەلەر جانە ورتا جاستاعىلار مەن قارتتار. دامىعان قالالارداعى تۇتىنۋشىلاردىڭ قوي ءسۇتىن قابىلداۋ دارەجەسى ءبىرشاما جوعارى. ماۋ شينپىڭنىڭ قوي ءسۇتىن ساتۋمەن اينالىسقانىنا 10 جىلدان استى. ونىڭ تىلشىگە ايتۋىنا قاراعاندا، ەڭ العاشىندا قوي ءسۇتىن كوپ ادام ەلەپ كەتپەگەن ەكەن، ەڭ اۋەلى تۇتىنۋشىلارعا ءدام تاتقىزىپ، ماقتاي ءجۇرىپ ارەڭ وتكىزەتىن، الايدا، قازىر ساتىلماي قالار دەپ الاڭدامايدى ەكەن، قوي ءسۇتىنىڭ ساۋداسى بارعان سايىن كۇسەت بولۋدا.

شاڭحاي قالاسى چاڭنيڭ رايونىنداعى ءمالىم تولايىم ساتۋ دۇكەنىنىڭ باستىعى ماۋ شينپىڭ بىلاي دەدى: شاڭحايعا العاش كەلگەندە كۇندىك ساۋدام نەشە ءشومىش ءسۇت ساتۋدان اسپايتىن، ال قازىر ساۋدامىز دۇرىلدەپ تۇر. مۇندا كەلگەنىمە دە 10 جىل ۋاقىت بولدى، جىلدىق ساۋدا سوماسى مولشەرمەن 1 ميلليون يۋانعا جۋىقتايدى، ونىڭ ۇستىنە ءار جىلى %10 تەن %20 كە دەيىن ارتىپ بارادى.

 

شاڭحايلىق تۇتىنۋشى: باعاسى سيىر سۇتىنەن ءسال قىمبات، الايدا، قوي ءسۇتىنىڭ ءدامى تاڭدايىما تاتيدى،ـ دەدى.

 

تاعى ءبىر شاڭحايلىق تۇتىنۋشى بىلاي دەيدى: ءبىزدىڭ بالامىزعا سيىر ءسۇتى جاقپايدى، سوندىقتان قوي ءسۇتى پاراشوگىن بەرىپ ءجۇرمىز.

ءتىلشى شاڭحايدىڭ جاڭا ونىمدەر ەرەن بازارىن كوزدەن كەشىردى. بۇل ارادا دا قوي ءسۇتى ونىمدەرىنىڭ ساتىلۋ مولشەرى ارتۋ كۇيىندە ەكەن. قازىر قوي ءسۇتى بازارىنىڭ كولەمى 10 ميلليارد يۋاننان اسقان بولىپ، كاسىپ سالاسىنىڭ جىلدىق ورتاشا كۇردەلى ارتۋ قارقىنى %25 تەن جوعارى بولدى. مامانداردىڭ تانىستىرۋىنا قاراعاندا، قوي سۇتىندە وڭاي قورتىلۋ، اسىرە سەزىمتالدىعى تومەن بولۋ سياقتى ەرەكشەلىكتەر بار بولىپ، تۇتىنۋشىلاردىڭ قارسى الۋىنا يە بولىپ كەلەدى ەكەن.

 

قوي ءسۇتىنىڭ ساتىپ الۋ باعاسى وتكەن جىلدىڭ ۇقساس مەزگىلىندەگىدەن %50 جوعارىلاپ، باعىمشىلار ءوندىرىستى كەڭەيتىپ، بازارعا تالاسۋدا

 

بازار كولەمى ۇزدىكسىز كەڭەيۋمەن بىرگە، قوي ءسۇتىنىڭ ساتىپ الۋ باعاسى بىلتىرعى ۇقساس مەزگىلدەگىدەن %50 جوعارىلادى، مۇنداعى سەبەپ نەدە؟

 

شاندۇڭ ولكەسى تاي-ان قالاسىنداعى ءبىر ساۋىن ەشكى باعىمشىلىق بازاسىندا، ءار كۇنى تاڭەرتەڭ ەشكىلەردى ءسۇت ساۋۋ زالىنا ايداپ اپارىپ ساۋىپ الادى. قىزمەتكەر ەشكىلەردىڭ جەلىنىنە ساۋۋ قۇبىرىن كيگىزگەن سوڭ، ەشكى ءسۇتى جابىق قۇبىرعا ەنەدى. ولاردىڭ كۇندىك ءونىم مولشەرى 300 كيلوگرامعا تايايدى ەكەن.

 

شاندۇڭ ولكەسى تاي-ان قالاسىنداعى بۇل باعىمشىلىق بازاسى نەگىزىنەن باشى-ناي سۇتىمەن قامدايدى. ءسۇتتى پاستەرشە باكتەرياسىزداندىرۋ ءادىسى ارقىلى ءبىر جاقتىلى ەتكەن سوڭ، جەرگىلىكتى ءسۇت پۋنكتىنە اپارىپ ساتادى. ال ءسۇت باعاسى ءۇستى-ۇستىنە جوعارىلاۋدا، قازىر 1 جىڭىن 16 يۋاننان ساتادى ەكەن (1 كيلوگرامى 32 يۋان)، وسى باعىمشىلىق الاڭىن تيجارات ەتىپ وتىرعان لياڭ رۇي جەم-ءشوپ پەن جەتكىزىپ بەرۋ اقىسىنىڭ وزىندىك قۇنى ارتىپ بارا جاتقاندىقتان، ءسۇت باعاسىن ءالى دە جوعارىلاتۋ ويى بارلىعىن جاسىرمادى.

قازىر باشى-ناي ءسۇتىنىڭ عانا باعاسى قىمباتتاپ وتىرعان جوق، جالپى قوي ءسۇتىنىڭ ساتىپ الۋ باعاسى بيىل كورنەكتى دارەجەدە قىمباتتادى. ءتىلشى شانشي ولكەسى باۋجي قالاسىنداعى ءبىر باعىمشىلىق الاڭىنا دا بارىپ قايتقان بولاتىن. باعىمشىلاردىڭ تىلشىگە ايتۋىنا قاراعاندا، بىلتىر ءسۇتتىڭ ءار كيلوگرامى 4 يۋان اينالاسىندا ەكەن، ال بيىل ءار كيلوگرامى 6 يۋاننان جوعارى بولىپ، وتكەن جىلدىڭ ۇقساس مەزگىلىندەگىدەن %50 ارتقان.

 

قوي ءسۇتىن ساتىپ الۋ باعاسىنىڭ جوعارىلاۋى باعىمشىلاردىڭ پايداسىن ارتتىرۋمەن بىرگە، ولاردىڭ ءوندىرىس كولەمىن كەڭەيتۋ سەنىمىن دە جوعارىلاتتى. لي يۋان اتتى باعىمشىنىڭ ساۋىن ەشكى باققانىنا 2 جىلدان استى، ەڭ العاشى 20 تۇياق ەشكى باعۋمەن جۇمىس باستاعان ول بيىل قارجى قوسۋ كولەمىن كەڭەيتىپ، ەشكىسىنىڭ سانىن 110 تۇياققا جەتكىزدى، كەلەر جىلعا دەيىن قوسقان قارجىمدى قايتارىپ الامىن دەپ مەجەلەۋدە.

شانشي ولكەسى باۋجي قالاسىندا ساۋىن ەشكى باعىمشىلىعىمەن شۇعىلداناتىن لي يۋان بىلاي دەدى: قازىر 63 تۇياق ەشكى ساۋىپ وتىرمىز، ءاربىر ەشكى كۇنىنە ورتا ەسەپپەن 6 يۋاننىڭ جەم-شوبىن جەيدى، 2.5 كيلوگرام ءسۇت بەرەدى، 63 تۇياق ەشكىدەن كۇنىنە 130 كيلوگرام ءسۇت الۋعا بولادى. سوندا مۇنىڭ كۇندىك كىرىمى 900 يۋاننان استام بولادى دا، كۇندىك تازا كىرىس 600 يۋاننىڭ ۇستىندە تۇرادى.

 

كاسىپتىك قايراتكەردىڭ تىلشىگە ايتۋىنا قاراعاندا، وسى رەتكى قوي ءسۇتىنىڭ قىمباتتاۋىنداعى سەبەپ ـ ءبىر جاعىنان، تۇتىنۋشىلاردىڭ سۇرانىسى ارتىپ، ءسۇت قاينارىمەن قامداۋ ءالى دە تاپشى بولىپ وتىرسا، ەندى ءبىر جاعىنان، جەم-ءشوپ باعاسىنىڭ قىمباتتاۋى دا ىقپالىن تيگىزىپ وتىر ەكەن.

 

كاپيتال ەنگىزىلىپ، ءسۇت ءونىمى كاسىپورىندارىنىڭ كولەمى كەڭەيدى، ەندى قوي ءسۇتىنىڭ كاسىپتىك ولشەمىن كەمەلدەندىرۋگە تۋرا كەلەدى

 

حۋاجيڭ كاسىپ سالاسىن زەرتتەۋ ورنىنىڭ مەجەسىنە نەگىزدەلگەندە، 2021-جىلى ەلىمىز قوي ءسۇتىنىڭ ءونىم مولشەرى 1 ميلليون 458 مىڭ تونناعا جەتەدى ەكەن. ەلىمىزدىڭ ساۋىن ەشكى شارۋاشىلىعى دا ءداستۇرلى باعىمشىلىق ۇلگىسىنەن وسىزاماندانۋعا، شوعىرلى شارۋاشىلىققا قاراي بەت الدى. ءار باعىتتاعى كاپيتال تۇگەل بىلەك سىبانا سايلانىپ، كوپتەگەن ءسۇت ءونىمى كاسىپورىندارى قوي ءسۇتى بازارىنا ويىسۋعا قامدانۋدا.

 

شانشي ولكەسى شي-ان قالاسىنداعى ءبىر قوي ءسۇتى پاراشوگىن وندىرەتىن كاسىپورىندا ءوندىرىس سەحىنداعى قوس ءونىمدى بۋلاندىرعىش قوي سۇتىندەگى سۋ قۇرامىن بۋلاندىرىپ، ءسۇتتى قويمالجىڭعا اينالدىرۋدا. پارلاندىرۋدان وتكەن قوي ءسۇتى قويۋ ءسۇت كۇبىسىنە قۇيىلىپ، ءبىر قىدىرۋ مانەرلەۋدەن وتكەن سوڭ، بىرتىندەپ ءسۇت پاراشوگى بولىپ وندىرىلۋدە. كاسىپتىك قايراتكەردىڭ تىلشىگە ايتۋىنا قاراعاندا، بىلتىر ىندەت جاعدايىنىڭ ىقپالىنا ۇشىراعاندىقتان، قوي ءسۇتىنىڭ باعاسى تومەن بولعان ءارى ساۋداسى دا تىم كوڭىلدەگىدەي بولماعان، ال بيىل ءوندىرىلۋ-ساتىلۋ جاعدايى مۇلدەم باسقاشا ەكەن.

شانشي ولكەسىندەگى ءمالىم قوي ءسۇتىن مانەرلەۋ كاسىپورنىنىڭ باس مەڭگەرۋشىسى سۇن چيۋبو بىلاي دەدى: بىلتىر 9-ايدا 50-60 توننا ءونىم وندىرگەن بولاتىنبىز، ىندەت جاعدايىنىڭ ىقپالىنا ۇشىراعاندىقتان سولاي بولدى دەپ ويلايمىن. ال بيىل 9-ايدا 80-100 توننا ءونىم وندىرە الامىز، مۇنى بۇرىنعى جىلداردىڭ ۇقساس مەزگىلىمەن سالىستىرعاندا، ىندەت جاعدايىن شىعارىپ تاستاپ ويلاستىرعاندا، ءىس جۇزىندە وتكەن جىلدىڭ ۇقساس مەزگىلىندەگىدەن ارتقان، ونىڭ ۇستىنە ارتۋ مولشەرى دە از ەمەس.

 

قوي سۇتىنەن وندىرىلەتىن ونىمدەر سۇيىق ءسۇت، ءسۇت پاراشوگى، ايران جانە ىرىمشىك قاتارلىلاردى قامتيدى. كاسىپتىك قايراتكەردىڭ ايتۋىنشا، قوي ءسۇتىن ساتىپ الۋ باعاسىنىڭ ءوسۋى كاسىپورىنداردىڭ ءوندىرىس وزىندىك قۇنىن ارتتىرىپ جىبەرگەن ەكەن. الايدا، كاسىپورىندار پارىقتى ءونىم جاراتۋ ارقىلى جالپى پايدانى جوعارىلاتىپتى، كەلەسى قادامدا ءوندىرىستى ۇزدىكسىز كەڭەيتۋگە ازىرلەنۋدە.

قازىر كوپتەگەن ءسۇت ونىمى كاسىپورىندارى، مىسالى: يلي، مىڭنيۋ، فيحى قاتارلىلار قوي ءسۇتى ءونىمىن وندىرۋشىلەر قاتارىنا قوسىلىپ بولعان، تەرەزەلىك مەزگىلدەگى باسەكە ۇدەي تۇسۋدە. كاسىپتىك قايراتكەردىڭ ايتۋىنا قاراعاندا، ءسۇت پاراشوگى بازارىنداعى نارەستەلەرگە ارنالعان ءسۇت پاراشوگى بازارىندا شونجارلاردىڭ مونوپوليالاپ الۋ جاعدايى جارىققا شىعىپتى. بۇعان قاراعاندا ەرەسەكتەر ءسۇت پاراشوگى بازارى ءبىرشاما بىتىراڭقى. ەلىمىزدە وندىرىلگەن ايگىلى ماركالار دا بازاردان وزىندىك ورىن الام دەيدى ەكەن، ايگىلى ماركا اسەرىن قالىپتاستىرىپ عانا قويماي، تۇقىم جەتىلدىرۋدى ۇزدىكسىز ساپالاندىرىپ، ءسۇت قاينارىمەن قامداۋدى ارتتىرۋى كەرەك. مۇنان تىس، قوي ءسۇتى ونىمدەرىندە دەربەس مەملەكەتتىك ولشەم جوق، ولشەمنىڭ كەمشىل بولۋى دا قوي ءسۇتى كاسىبىنىڭ ونان ارى دامۋىنا تۇساۋ بولىپ وتىر.

 

اۋدارعان: نۇرگۇل قۇمارقان قىزى

来源:中国经济网

 

 

编辑、制作:古丽美热

: , 。 视频 小程序 赞 ,轻点两下取消赞 在看 ,轻点两下取消在看

中央广播电视总台 央广网 版权所有

قوي ءسۇتىنىڭ باعاسى %50 قىمباتتادى

بازار كولەمى ۇزدىكسىز كەڭەيۋمەن بىرگە، قوي ءسۇتىنىڭ ساتىپ الۋ باعاسى بىلتىرعى ۇقساس مەزگىلدەگىدەن %50 جوعارىلادى، مۇنداعى سەبەپ نەدە؟